NAIS NAMIN NG MAS MAAYOS NA KAMATAYAN
Tula ni Mosab Abu Toha
(Salin ng tulang Palestino)
(Malayang salin ni Gregorio V. Bituin Jr.)
Nais namin ng mas maayos na kamatayan.
Pinapangit at pinilipit ang aming katawan
ng burda ng mga punglo at granadang nagputukan.
Mali ang bigkas ng aming pangalan
sa radyo at telebisyon
Ang aming larawang nakadikit sa dingding
ng aming gusali ay kumupas na't namutla.
Nawala ang mga nakaukit na tala sa aming lapida,
na natatakpan ng dumi ng mga ibon at bayabag.
Walang nagdidilig sa mga punong nagbibigay
ng lilim sa aming libingan.
Ang nagliliyab na araw ay nagapi
ng aming naaagnas na katawan.
10.02.2024
* Si Mosab Abu Toha, isang makata at manunulat na Palestino mula sa Gaza Strip, ay nagsasabi sa atin: "Sa Gaza, ang Kamatayan ay Mas Ligtas kaysa Mabuhay". Noong Oktubre 2023, si Abu Toha, kasama ang kanyang asawa at mga anak, ay lumikas sa kanilang tahanan at lumipat sa Jabaliya refugee camp matapos magbabala ng Israel tungkol sa pambobomba sa lugar. Ang tulang ito ay pagninilay sa kalagayan ng mga Gazano sa harap ng karahasang Israeli.
Pinaghalawan ng tula mula sa kawing na:
Proyektong pagsasalin na balak ilunsad bilang aklat sa Nobyembre 29, 2024, International Day of Solidarity with the Palestinian People
No comments:
Post a Comment